TRANSPORTE URBANO
O BNG reclama máis paradas do servizo comarcal de autobús ao seu paso por Mos
O proxecto da Xunta contempla unha única parada en Puxeiros para as liñas que atravesan o termo municipal a través da N-120 e a A-55
O documento da Consellería de Infraestruturas presenta numerosos erros e contradicións sobre a demanda actual do servizo
O concello de Mos sairá moi prexudicado se sae adiante a proposta para o transporte de viaxeiros por estrada realizada dende a Xunta de Galiza. Así o entende o BNG, que pediu explicacións no último pleno ante a inacción do goberno do PP. O portavoz nacionalista, Gustavo Barcia, preguntou se o Concello de Mos presentara algunha alegación ao proxecto da Consellería de Infraestruturas e Mobilidade e a resposta, por parte da concelleira Julia Loureiro, foi que o proxecto afectaba só a dúas liñas, minimizando así o seu impacto real.
Ante o desleixo do goberno municipal o BNG de Mos, en conxunto co da Comarca de Vigo, decidiu presentar unha serie de alegacións encamiñadas a garantir unha mobilidade sustentábel e responsábel. O Consello Local do BNG defende a necesidade de que as liñas de transporte público das comarcas do Baixo Miño e Condado-Paradanta que atravesan Mos a través da N-120 e a A-55 conten, como mínimo, con tres paradas en Sanguiñeda, diante da casa do Concello e en Puxeiros. Deste modo, o servizo podería contribuír a fortalecer a cohesión social, a garantir a seguridade e preservar o uso en condicións dos espazos públicos, algo que este proxecto non cumpre.
Erros no documento
O BNG denuncia, ademais, que o documento elaborado pola Consellería non é válido para unha correcta avaliación da proposta. Presenta numerosos erros e contradicións, un exemplo son as cifras relativas á demanda actual de mobilidade no concello de Mos. Neste sentido, os datos do anteproxecto para a zona do Baixo Miño e o sur da comarca de Vigo (XG883) son distintos dos que figuran no apartado correspondente á zona sur da comarca da Paradanta e O Condado (XG888):
| RUTA | XG883 | XG888 |
| Vigo – Mos | 3.285 | 3.810 |
| Vigo – O Porriño | 27.466 | 25.433 |
| Mos – O Porriño | 1.273 | 1.812 |
| Mos – Vigo | 2.857 | 3.810 |
Por outra parte, na propia memoria do documento indícase que “a capacidade da Administración para establecer as tarifas a abonar polas persoas usuarias en cada caso inclúe a posibilidade de establecer bonificacións xerais”. O BNG entende que as tarifas e as bonificacións correspondentes deben quedar xa definidas con claridade no propio anteproxecto e que deben ser, ademais, de carácter obrigatorio e non opcional.
