A Sala Rebullón consolidouse como un espazo de referencia para a escena musical e cultural galega. Cales son as claves do éxito?

Poucos espazos culturais están tan ben deseñados como A Rebullón. Tomás Ageitos é un dos mellores enxeñeiros de son de Europa e Xabi Carnota, outro referente nos escenarios. Xuntar a estes mega-cracks neste proxecto, para que te fagas unha idea, é como xuntar a Messi e Cristiano Ronaldo no mesmo equipo. Grazas ao seu traballo, podemos gozar da mellor acústica do País e dun dos escenarios máis cómodos para as artistas. Se a isto lle sumas que facemos as cousas con todo o corazón e tratando a público e artistas do mellor xeito posíbel, temos a sala na que todo o mundo quere actuar. Cada día recibo 10 ou 15 emails de bandas e compañías de teatro interesadas.

E todo isto conseguiuse sen o apoio do Concello?

O Concello... pois que queres que che diga. Desde non autorizar un ciclo de concertos financiado polo Xacobeo até tentar convencer a programadoras para que non veñan. Por outra parte, a Xunta de Galiza e o AGADIC consideran que non somos "profesionais" e non podemos optar a entrar na Rede Galega de Música ao Vivo, nin na Rede Galega de Teatros e Auditorios. Non lles cabe na cabeza que As Pedriñas sexa o Centro Cultural Veciñal coa maior actividade cultural do País. A nivel institucional, contamos con colaboración da Deputación e non me canso de dicir que este proxecto non sería posíbel sen a confianza da Comunidade de Montes de Tameiga.

Como cres que debería cambiar a política cultural do Concello de Mos?

A concelleira de Cultura é tan inepta que nin as bases do "seu" Plan Cultural municipal é capaz de cumprir... A programación debería chegar a todas as parroquias e non só a dúas. A min, persoalmente, paréceme gravísimo que existan asociacións boas e asociacións malas para este goberno. En Mos temos moitísimo potencial, un tecido asociativo que traballa arreo para dinamizar este pobo e ao que o goberno municipal ten que apoiar sen amiguismos nin cacicadas.

Por outra parte, temos un multiúsos municipal totalmente infrautilizado e podrecendo cando podería acoller todo tipo de actividade cultural se investísemos no equipamento preciso para que o auditorio cumprira cun mínimo de necesidades técnicas. Pero claro, para iso hai que estar pendentes de convocatorias públicas, subvencións, etc.